Tauncang Den Ari Ko…!

Oleh: Firdaus

Sanjo lah lapeh. Urang takuik ka lua rumah. Badai maradang surang. Sajak salapeh luhua inyo bukak pondok untuk manggaleh sate, alun juo bajua bali. Nan sakali ko, tampaknyo mangalesoh-ngalesoh surang.  Bantuak urang panik. Panik ka suok, panik ka kida.

Di pond ok satenyo, indak surang juo nan ado. Nan takana dek inyo, si Karapai. Dua hari nan liwaik, konconyo ko mancaritoan tantang supermoon.  Indak sakatek kaba patakuik nan disampaian dek paja surang tu. Dek supermoon tu, ka tajadi bancano, mako labiah elek tingga di rumah sajo.

Kok diituang jo hari nan disabuk dek Karapai, kini mah supermoon tu. Manjalang malam nan ka laruik, indak basobok jo nan dikecek-an dek Karapai tu. Indak ado bancano tu doh. Kok hujan, iyo hujan sangenek, indak ado hubungannyo jo supermoon tu bagai doh. Kok hujan ko alah biaso mah.

Badai masih dapek marasoan ba-a caro Karapai mancaaritoan di pondok satenyo. Iyo barapi-rapi. Basumangaik bana paja tu. Lapeh dari pondok, inyo mancaritoan itu bagai di lapau kopi Mak Taci, atau maota katiko wirid di Surau Buluaih. Bantuak urang cadiak bana gaya paja tu.

Katiko dibantah dek Badai, inyo indak namuah kalah doh. Dek badai, jan kan ka kalah, podo se indak namuahnyo doh. Akibaiknyo,  kaduonyo basitagang urek mariah tadi malam. Katiko kaduonyo basitagang urek mariah, indak surang juo nan namuah manyabaan kaduonyo. Urang nan ado di pondok sate tu tau, dek disabaan makin manjadi ribuiknyo.

Di malam nan ko, Badai manunggu-nunggu Karapai. Atinyo sakik. Dek caritonyo duo hari kapatang ka banyak urang, indak surang juo nan ka lua rumah. Sumbayang mugarik indak bara urang, sumbayang isya tingga garin sajo. Tadi wakatu mugarik ado pengumuman, tapi Badai indak tau apo nan disampaian dek garin tu.

Kok coiko karajo kawan ko sakali sabulan, bisa-bisa pondok sate ko tauncang. Ka dipangakan sate nan ado. Kok tatupek jo dagiang, lai indak baa bagai doh, tapi kok kuahnyo, bisuak indak lamak lai doh. Itu nan indak bisa ditarimo dek kawan nan surang ko.

Dibungkuihnya kuah sate dek Badai, duo bungkuih. Dalam banaknyo, inyo ka manuruik Karapai ka rumahnyo. Kok basobok jo Karapai, dibaenyo kawan surang tu jo kuah sate ko. Itu nan kalamak deknyo, itu nan tabayang di banak Badai.

 Di sapanjang jalan, indak surang juo nan basobok dek Badai. Badai indak habih pikia, kok bisa-bisanyo urang ko picayo se jo kecek Karapai. Badai maraso, Karapai ko lah mampatakuik urang. Urang kampuang nan bodoh, tantu murah se picayo.

Sampai di muko rumah Karapai, Badai indak manampak tando-tando kalau di rumah tu ado urang. Lampu langkan jo lampu di ruang tangah mati pulo lampunyo. Tukang sate tu binguang. Kamalah paja ko, keceknyo dalam ati.

Katiko sadang binguang tu, indak lamo di antaronyo  tadangan langkah kaki urang banyak, tadanga surang banyak urang. Diparatiannyo, suaro tu datang dari selatan manuju arah ka Nagari Matiraso. Ditunggunyo sabanta sampai urang tu basobok dek nyo.

Bai tu urang-urang tu sampai dakeknyo, Badai mananyoan dari mana barami-rami. Mulonyo indak ado nan namuah manjawek, tapi disasak-an dek Badai taruih. Dari ma tadi, sudah tu manga barami-rami.

Raso ditembak patuih tungga, badan Badai manggigia angek dingin sakutiko. Urang-urang tu, urang kampuangnyo, tadi barombongan dari Kampuang Sabalah. Manjalang mugarik urang-urang tu dapek kaba, urang gaek Karapai sakik lalu, kecek urang kini sakik mandadak dek angin lalu. Urang takajuik datang barami-rami ka Kampuang Sabalah.

Sajam nan lewaik, sakiknyo alah agak bakurang. Lah mulai tau jo urang baliak. Karapai ado di situ, kecek wali jorong. Wali jorong tu manyabuik pulo bahaso, hanyo Badai nan indak datang mancaliak, caliak takajuik.

Dek indak dapek manyuruak-an muko, Badai manyabuik inyo datang ka rumah Karapai justru dek ka pai mancaliak, tapi indak tau nyatonyo urang gaek Karapai tu di kampuangnyo. Inyo malagak-an ka wali jorong kalau nan dibaoknyo ko kajadi buah tangan untuk mancaliak gaek Karapai. Wali jorong tu maangguak-angguak dek nyo.

Sudah tu wali jorong manyampaian ka urang nan pai ka Kampuang Sabalah untuak singgah ka pondok sate si Badai. Kecek wali jorong, Badai manyadioan sate perai malam ko untuak urang nan pai ka Kampuan Sabalah tadi. Badai marasoan, pasti lah lapa paruik dunsanak sadonyo, mako dek raso badunsanak nan arak di kampuang ko, inyo agiah ka sadonyo sate perai.

“Tauncang den hari ko…” rutok Badai dalam ati.*


CATATAN:
Tulisan ini dimuat di Harian Umum Rakyat Sumbar pada rubrik TUKANG KIPEH edisi 21-03-2011