Oleh: Firdaus
Urang nan balanjo di pondok sate
Tukang Kipeh, kalua ciek-ciek. Sakik talingo urang tu dek iruak suaro Badai jo
Karapai basitagang urek Mariah. Baduonyo basikaruak arang, tapi iruaknyo
bantuak bulando mabuak. Manciracau kaniak kanin. Kok balamo-lamo di pondok sate
ko, bisa pacah gandang talingo. Itu nan tapikia dek urang-urang tu, makonyo urang
tu pa-i. Dek pangana Badai ka si Karapai, luponyo minta pitih sate urang-urang
nan pai tu.
“Indak waang mintak pitih sate
urang-urang tu?” Karapai maingek-an.
“Manga lo itu nan waang cikarau-i..?”
Badai baliak batanyo.
“Aden mangana-an se-nyo, kan rugi
waang kalau urang-urang nan tu bakirok se salasai makan sate,”
“Tu indak urusan waang tu doh.
Nan sate, sate waden. Na mangaleh waden. Kok rugi, waden nan rugi, indak waang
bagai doh. Jan waang ma-aliah-aliahan pakaro.
“Tasarah waang-lah, maleh waden
mangecek jo waang…” Karapai tagak dari tampek duduaknyo, tu dilatak-an pitih
dua puluah ribu sambia menyampaian; nan disungkahannyo sapiriang sate tu
batambah tujuah tusuak dagiang, pakaia karupuak laweh bakuah tigo buah.
Mancaliak konco palangkinnyo tu
tagak, Badai maambek jalan Karapai, “wak salasaian pakaro wak dulu!”
Badai indak talok manarimo kalau
mamaknyo disabuik cemen, bahaso urang kini. Keceknyo, kalau indak disalasaian,
baparang kaum bana, ditampinnyo mah. Dek inyo jo kaumnyo, mamak tu tampek
batanyo ka pai, babarito kok lah baliak. Tampak baiyo batido.
Kato-kato cemen tu didanga Badai
dari Karapai. Talingonyo sirah, darahnyo naiak ka ubun-ubun. Inyo tau, cemen tu
labiah buruak dari nan paliang buruak, dituduah indak talok manga-manga,
samantaro mamaknyo tu lah basimbah paluah untuak manjadi walinagar di Nagari
Matiraso ko, lah ampia abih jarakjarupiahnyo untuak bisa mamacik tampuak
pimpinan di nagari.
Karapai mulonyo mancubo mambela
diri. Keceknyo, kato-kato tu didapeknyo dari urang-urang di nagari ko nan
mampagunjiangan walinagari tu. Mukasuiknyo ka mangabaan apo adonyo, eh.. Badai
manarimo jo tabik suga. Itu nan mambuek kaduonyo basiarak di pondok sate tu.
“Bia waang konco palangkin sajak
genek dek den, tapi kok coitu caro waang ka mamak den, iyo tasingguang puncak
kada den dek waang mah…” hogoh Badai.
“Kok iyo baitu, nan tunggu waang
di bukit alang-alang. Wak salasaian surang-surang,” baleh Karapai indak kalah
lo tabik suga.
Diago co itu, Badai indak kalah takajuik.
Kini baliak inyo indak manyangko dikandak-an coitu dek Karapai. Lututnyo
manggigia. Pucek pasia bibianyo. Karapai tau, kok iyo inyo basihumpeh jo
Karapai, indak katalok deknyo doh.
Ilimu sikek nan dibaoknyo ka
rantau sangkek sari, indak sabara kalau diadu jo ilimu silek Karapai. Ilimu
Karapai lah subana tinggi, ilimunyo di dapek langsuang dari Angku Gadang Nan
Bagak Tiado Bandiang, tuo silek di nagari tu. Angku Gadang tu mamak kanduang
dek Karapai. Bidin baraja silek ka si Karapai. Indak mungkin murik malawan ka
guru.
“Baa kok antok waang? Cigin
waang? Tu makonyo, jan asa mararah sajo. Aden mangecek-an supayo ado nan ka
waang kecek-an ka mamak waang tu. Jan manggaluah juo lai!” pintak Karapai.
Sabulan ko, Walinagari Matiraso
tu dipagunjiangan dek urang sakampuang. Indak ado angin, indak ado badai, eh
inyo takatai-katai sesurang. Dikecekannyo, indak disangko manjadi walinagari ko
rumik doh. Sadonyo alahnyo dikarajoan, tamasuak manyalasaian urang bacakak laki
bini. Sudah tu, lah bakarajo wak salah, indak dikarajoan labiah salah pulo. Dimuko
awak disanjuang, dibalakang dipagunjiangan.
“Lah untuang mah lai ado
disanjuang, cubolah kok dipagunjiangan setaruih, lah is dead nyo mah,” Karapai mancaca.
“Waang kecek-an ka mamak waang
tu, inyo kan lai urang cadiak bijaksano mah, lai urang basikola tinggi, lahia
jo gadang di kampuang, cadiak di rantau, kok lah tapiliah manjadi walinagari lo
mangecek-an baru tau sarik manjadi wali nagari tu? Kok salamo ko indak tau? Kok
indak salah nan waden tau, walinagari nan digantiannyo kan lai kawan liau mah,
kok indak batanyo ka kawannyo tu? Kama se salamo ko? Kok iyo indak tau, indak
salah kok mamak waang tu den sabuik cadiak pandia tu doh. Inyo cadiak, tapi
pandia kironyo,”
“Kok lah disampaian coitu, jikok
liau minta jalan kaluanyo, ba-a manuruik waang?”
“Indak sarik bagai tu doh. Suruah
se liau maangkek bendera putiah lai, salasai tu mah. Indak jadi walinagari liau
lai tu doh,”
“Sia gantinyo?”
“Jan itu pulo nan waang pikian.
Nan jaleh, pasti indak waang. Mamak waang se indak talok doh, apo lai waang!”
Sasudah mangecek tu, Karapai
bajalan. Tigo kali Badai mamanggianyo. Jan kan ka dijawek, mancaliak ka
bulakangnyo indak deknyo doh.*
CATATAN:
Tulisan ini dimuat pada Harian Umum Rakyat Sumbar, edisi 21-02-2011
No comments:
Post a Comment