Leptop Pak Dewan

Oleh: Firdaus

 Karapai duduak di paleh-paleh pondok sate Tukang Kipeh. Badai nan manamoan dirinyo si tukang kipeh, maangguak-angguak sambia mancimeeh sambia mangipeh, maiduik-an baro mamanggang sate.

Makin dicimeehnyo konco palangkin nan surang tu, samakin dikirai-e kipeh sate. Baun bawang goreang nan dipanggang di baro mengirai-ngirai bulu iduangnyo. Arun bana baunnyo.

“Lah mambaok leptop lo waang kini? Dima dapek dek ang tu?” sambia malatakkan sapiriang sate Dangduang Danguang ka konco palangkinnyo tu, Badai mananyoan barang nan dikambangan di meja nan dibuek dari buluah basusun.

Agak kambang iduang Karapai. Bujang lapuak tu maraso jadi urang ebat dek ado leptop di tangannyo. Dikambangnyo leptop tu, “galeh den nan sabulan ko lai laku, makonyo den bali leptop,” jaweknyo manjalehan ka Badai.

Wow.. Badai tanganggo. Muncuangnyo bulek bantuak uruf O. Inyo indak manyangko, konco palangkinnyo lah dapek mambali leptop dek galehnyo.

“Apo guno leptop tu dek ang?”

Karapai galak takikiah sambia mancimeeh konco palangkinnyo tu, “Iyo lah ongok raya bana waang mah. Apo guno leptop nan waang tanyo ka waden. Waang tanyoan ka anak es-de se tau-nyo mah. Iyo-lah andia waang mah. Pakak badak!”

Karapai galak sajadi-jadinyo. Indak baranti digalak-an konconyo tu doh. Dek digalak-an indak baranti-baranti, Badai tabuk siga.

“Alah tu. Barantilah la-i. Kok indak juo waang baranti, bakiroklah dari siko!”

“Sori pren. Indak ado bagai mukasuik mancimeeh waang doh, tapi nan waang tanyoan tu nan mambuek sakik paruik den deknyo. Bantuak indak ado se nan ka waang tanyoan,”

“Iyo salut pulo den ka waang, lah bisa mambali leptop. Lah kalah pulo pak dewan dek waang”

“Mukasuik waang, Dai?” tanyo Karapai.

Cakak babaleh. Badai pulo nan galak takikiah, “Indak den sangko, kawan den nan mangaku ebat, eh.. labiah ongok raya dari waden. Indak tau apo nan tajadi. Makonyo, yang gaul dong men!”

“Oke, pren! Den mangaku, tapi apo nan waang mukasuik?”

“Ba-a indak ka ebat den mukasuik dek waang. Anggota dewan nan bagaji gadang se, indak bisa mambali leptop doh. Dek indak bisa mambali leptop, dimintak-an leptop tiok urang dibalian jo pitih nagara. Bantuaknyo maha bana harago leptop tu…”

“Soal maha atau indak, tagantuang merek jo jenis leptopnyo. Ado nan baharago tigo jutaan sampai tujuah atau sambilan jutaan. Nan tigo juta tu, lah cukuik mah, apo lai sampai tujuah jo sambilan juta,” Karapai manjaleh-an.

Kaniang Badai bakarenyuik, “hanyo saharago tu? Nan dimintak dek anggota dewan tu haragonyo tujuah baleh juta ciek”

Kaniang Karapai nan baliak bakarenyuik? “kalau itu nan dimintak, iyo indak tau dek den kadipakaia untuk kana leptop tu. Nan harago tujuah atau sambilan juta tu, lah sabana paten mah, lah bisa untuak dipabagai-bagaian leptop tu..”

“Itu-lah nan indak mangarati lo awak doh, iyo nan kalamak dek apak-apak tu se. Waang tau ndak, pak dewan nan di nagari Padanglapang lah dibalian leptop, eh.. leptop tu kironyo untuk dipajang di almari se, ado lo nan hanyo untuak anak-anaknyo. Ado nan labiah kurang aja, dipakai untuak main fesbuk se, indak ado guno nan lain. Rakyaik nan lapa indak tau urang-urang tu doh. Cubo pitih pambali leptop tu dibalian ka lado atau bareh nan maha kini, tu diantaan ka urang-urang nan indak makan, ado juo faedahnyo mah,” Badai manciracau surang sambia mangipeh satenyo.*

CATATAN: Tulisan ini dimuat di Harian Umum Rakyat Sumbar, edisi Senin, 24 Januari 2011