Banyak Lagu Waang Mah…!

Oleh: Firdaus

Pulang dari ladang, Karapai tampak tapere-pere.  Katiko lalu di muko pondok sate Tukang Kipeh, Karapai dipanggia dek si Badai, kanconyo tu. Karapai antok se. Ampek kali diimbau, jan-kan manjawek, mancaliak se indak.

Niek ka mamanggia agak sakalai lai di ati Badai, dibata-annyo. Kecek atinyo, indak ado gunonyo. Kok dipanggia, tu indak juo mancaliak, takanceh raso ati Badai. Kama muko ka disuruak-an. Jan-jan urang nan duduak di pondok sate tu mangecek-an Badai sok santun.

Babaliak ka tampek duduaknyo, Badai indak abih pikia, dek-a lah kawannyo nan surang tu. Kok tasapo di ladang, rasonyo indak ka mungkin. Badai tau bana baa bantuak ladang di nagarinyo tu. Ladang di nagarinyo tu barasiah sadonyo, sudah tu, salamo ko indak ado nan ganjia di nagari ko doh.

Lah sapakan lamonyo, indak juo Karapai sakali pun singgah di pondok sate Badai. Konco palangkinnyo tu indak tangguang binguang. Salamo ko, indak parnah bantuak iko bana konco nyo tu. Kaniang Badai bakaruik, diingek-ingeknyo bilo Karapai tarakhir kali ka pondoknyo.

Katiko kaniangnyo bakaruik tu, takana dek Badai, konconyo tu tampak basanang ati. Galak tiok sabanta di suduik tampek biaso duduak. Nan mambuek Badai eran, katiko tu Karapai mambaia saisi pondok. Salamo duduak di pondok tu, kok ado nan bali sate batungkuih untuak dibaok pulang, Karapai nan mambaia. Sadonyo disubarangan.

Dikana-kana ka balakang, salamo ko indak sakali juo Karapai nan coitu. Kok duduak di pondok, jiko Karapai mintak sagaleh kopi, biasonyo ditambah jo satangah piriang sate. Tu dibiaia langsuang. Jiko mintak kopi sakarek, biasonyo tu tando inyo indak baok pitih. Mintak utang mah. Tapi dek inyo konco palingkin dek si Badai, biasonya Badai indak manulihnyo jadi utang doh, diagiah sajo sakarek kopi tu. Eh.. sapakan nan lampau, inyo baaian urang sapondok.

“Lah kayo kawan mah?” tanyo Badai katiko tu. Nan ditanyo tampak galak-galak senggeang sajo. Indak mangecek banyaknyo doh.

Sajak tu, indak ado Karapai ka pondok sate lai doh. Kok lalu pai jo pulang dari ladang, lalu sajonyo. Indak ado singgah lai. Biasonyo, bia indak duduak, agak sabanta lai mangecek juo dari jalan sambia manyapo Badai.

Salain kawannyo tu agak barubah, Badai juo marasoan rang mudo nan lain di nagari tu agak barubah juo. Indak saketek nan barubah jadi pandiam, indak saketek pulo nan bajalan bantuak urang mandok-mandok. Indak biaso bantuak tu doh.

*

Katiko pondok sate sadang rami-raminyo, urang kalibuik manjalang barabuik sanjo. Darah Badai tasirok. Kaba nan sampai ka talingonyo agak lain. Dituruiknyo ka tampek nan sadang rami tu. Urang kampuang balari-lari anjiang ka arah ladang. Badai ikuik jo arah urang balari tu.

Sambia balari, tampak dek inyo dima urang bakarumun. Arahnyo alah jaleh, tampek tu di ladang Karapai. Sabalun sampai di ladang tu, Badai maliek ado nan bajalan ka arahnyo. Disongsong pulo urang rami tu.

Indak tatahan datak jantuangnyo doh, Badai mancaliak Karapai bajalan paliang di muko. Disampiangnyo ada urang babaju saragam pulisi. Tangan Karapai dibalanggu kaduonyo. Karapai binguang. Apo nan tajadi jo konconyo ko?

Bantuak ditembak patuih di tangah ari, raso ka tangga jantuang Badai. Kecek pulisi, ado ganjo di ladang Karapai. Karapai baladang ganjo disalo-salo ladang pucuak parancihnyo. Paliang indak, lah saribu batang nan dihancuan dek pulisi, tapi Karapai indak picayo doh. Indak ka mungkin konconyo bantuak itu bana.

Tibo-tibo, Badai takana kajadian sapakan nan liwat. Inyo mampakiroan, dek bapitih mako konconyo bisa mambaian balanjo urang sapondok sate.

Katiko binguang tu, Badai baru manyasa indak mamparatian konconyo tu sajak sapakan ko. Inyo indak paduli jo apo nan barubah jo konconyo tu doh, inyo indak paduli pulo jo apo nan barubah jo urang mudo di nagarinyo tu.

Karapai manyimak apo nan dikecek-an dek pulisi ka walinagari. Sabananyo apo nan tajadi di nagari kini ko, bisa diilak-an sajak mulo jikok saluruah awak ko paduli jo nagari, paduli apo nan tajadi di lingkuangan, jo apo nan barubah dari nan taralah.

Dek di nagari ko lah iduik surang-surang, coiko-lah jadinyo.

“Waden indak adoh manga-manga doh, pren!” kecek Karapai katiko lalu dimuko Karapai.

Dalam ati, Karapai mangarutok. Banyak lagu waang mah…!

CATATAN:
Tulisan ini dimuat di Harian Umum Rakyat Sumbar, pada rubrik TUKANG KIPEH edisi 04-04-2011