Informan Pulisi

Oleh: Firdaus 

Urang sanagari lah buncah. Kaba si Karapai dibaok pulisi lah saluruah urang nagari nan tau. Lah sapakan pulo urang indak masobok jo Karapai. Sajak dibaok dek pulisi, indak tampak puncak iduangnyo lah sapakan.

Tapi nan mambuek urang binguang, anak bini Karapai tanang-tanang sajo. Katiko ado nan batanyo ka bini, si Upiak Banun manjawek bantuan urang acuah indak acuah sajo. Jaweknyo ciek se, antah baa uda kini, Upiak indak lo tau doh. Anaknyo, si Buyuang Atuik, manjawek hampia sarupo jo jawek mandenyo. Antah baa abak buyuang kini, indak pulo buyuang tau doh.

Salamo Karapai indak ado di pondoknyo, sajak itu pulo urang sanagari indak bakurang dari pondok nan di bawahnyo ado kandang ayam tu. Kasado alahnyo mananti, apo sabananyo nan tajadi dek Karapai. Kok iyo bantuak nan tampak dek urang sapakan lalu, Karapai dibaok dek pulisi, iyo-lah sabana parah mah.

Masuak hari ka sapuluah, Badai takalenjek. Kuah sate di sanduangnyo jatuah ka tanah. Pisau untuak mambalah katupek, mairih tangannyo.

“Kalera waang! Takajuik waden!” Badai mamprotes. Sakik atinyo.

“Waang nan kalera. Hampia sapuluah ari waden di kantua pulisi, indak sakali juo waang mancigok waden ma-anta rokok agak sabatang,”

“Kantua pulisi ma nan kan den turuik. Bini waang sajo indak tau dima waan doh. Baa pulo mako waden ka tau?”

Karapai tahanok.

“Waden curiga…”

“Curiga baa?” solo Karapai sabalum Badai manyambuang keceknyo.

“Sapuluah ari waden indak basobok jo waang, den caliak bantuak wa-ang malah makin segeh. Indak ado bantuak urang susah doh. Kok iyo waang ditangkok dek pulisi, tantu susah iduik waang di pinjaro tu. Atau, lah waang sogok pulo pulisi tu sadonyo sahinggo waang lapeh bantuak kini…”

Karapai kini yang antok dibuek dek Badai.

“Baa indak manjawek waang?” tanyo Badai.

Karapai antok. Kapalonyo baputa suek kida, bantuak ado nan dicaloaknyo.

“Den tanyo ka waang, bantuak waden nan saulah ko, apo waang caliak bantuak urang narkoba? Tukang jua ganjo? Sory bai-beh se lah dulu yo pren…”

Kaniang Badai bakaruik.

“Mukasuik waang?” Badai baliak batanyo.

“Waang tau ndak, bia bana waden bataranak ayam, punyo ladang satumpak, tapi waang musti bangga jo bahaso waden jadi kawan waang. Buruak bana bantuak waden, tapi waang pasti indak tau jo indak picayo bahaso kawan waang nan buruak kecek waang ko labiah dipicayo dek pulisi dari pada waang. Waden ko, informan pulisi. Nan ditangkok dek pulisi kapatang ko, itu banda ganjo gadang di banyak nagari. Dek info nan taruih waden agiah-an ka pulisi, akhianyo sindikat narkoba jo ganjo tu dapek ditangkok. Bakaruang-karuang barang haram tu didapek dek pulisi,” Karapai manjaleh-an.

Badai tanganggo. Muluiknyo mambulek bantuak huruf O.

“Kok iyo waang jadi informan pulisi, baa kok dari ladang waang tu, waang dibaoknyo, sudah tu kama sajo waang ilang salamo sapuluah hari kok,” tanya Badai antaro picayo jo indak.

“Waden dibaok untuk mangicuah urang di nagari ko sajo, buliah indak waden nan disangko informan dek urang-urang tu. Kok waden mailang sapuluah ari ko dari nagari, waden dapek hadiah dek apak-apak pulisi tu ka lua nagari,” jawek Karapai sambia mangaruak saku galembongnyo, sudah tu mangaluan gantuangan kunci nan ado gambar patuang singo.

“Kok baitu, iyo lamak pulo jadi informan mah…” sambuang Badai.

Karapai maangguak-angguak tando satuju jo nan disampaian dek Badai.

“Kok baitu, namuah pulo waden jadi informan pak pulisi tu mah…” Badai manyoroangan sagaleh kopi pauah di meja Karapai.

“Baa caronyo manuruik waang?” tanyo Karapai.

Badai galak senggeang. Sambia batuak tigo kali, sudah tu ditaruihannyo manggoyang-goyangan tangan suoknyo di muko dadonyo, bantuak gaya urang mangipeh sate, Badai manjawek jo suaro tanang, “waang cari jo baok narkoba atau ganjo sabananyo, sudah tu beko den sampaian ka pak pulisi tu. Kan jadi informan waden mah. Baa gak ati?”

“Kalera waang mah…!” sambuik Karapai sambia mambae-an daun mambungkuih lapek nan talatak di mejanyo. *

 CATATAN:

Tulisan ini dimuat di Harian Umum Rakyat Sumbar, pada rubrik TUKANG KIPEH, edisi 10-04-2011