“Kok Andia, Andia se-lah Kawan Surang…”

Oleh: Firdaus

Dek di pondok sate Tukang Kipeh  bakalibuak, surang-surang nan ka babalanjo, maurak langkah lambek-lambek, sudah tu langsuang tabang ambua.

Katiko indak surang juo di pondok satenyo, salain konco palangkinnyo, Badai maupek baturp-turo.

“Lah pueh waang? Dek ulah waang, indak surang juo di pondok den ko lai,” Badai tagang pinggang di muko Karapai.

“Kok waden pulo nan waang salahan?”

“Kan waang nan mamulai mah, waang pakaroan harago sate den ko..”

Karapai tagalak. Lamo indak baranti galaknyo. Sakali-sakali dipaciknyo paruik dek manahan galak. Mancaliak Karapai indak baranti galak,  sakik ati Badai deknyo. Tukang sate maraso surang, inyo dicimeeh dek kawannyo tu.

“Iyo sakik paruik den dek waang. Waang nan baulah, aden pulo nan waang salahan..” kecek Karapai.

“Waang samo jo nan lain, dima pulo urang maliang nan kamangaku. Kok adoh urang maliang nan mangaku, panuah tangsi mah..”

“Pren. Uran maurak langkah dari pondok sate ko, kan dek harago sate waang naiak mah. Lah jaleh iduik padiah, waang naiak pulo harago sate…”

“Den indak manaiakan bagai doh, tapi hanyo manyasuaian harago sajo…”

“Iyo lah samo lo waang jo pejabat mah. Lah jaleh harago minyak dinaiakan, manyasuaian harago keceknyo. Gaji pegawai randah naiak saketek, harago nan lain malambuang, nan inyo dapek remunerasi nan labiah gadang dari nan biaso. Jan dipabodoh juo rakyaik ko lai, harago naiak dikecekan penyesuaian. Iyo nan kalamak dek awak se,”

“Jan waden pulo waang tunjuak ajai lai, cadiak waden pada waang mah. Lah banyak rantau nan waden tampuah mah. Waang? Sajak lahia, sajak iduang waang ditampuah angok sampai lah ka baminantu pulo, indak  sakali juo kalua dari kampuang ko, indak jauah dari katiak induak doh…”

“O.. baitu. Jadi kalau lah mancubo marantau, tu lah cadiak bana? Lah ebat pulo waang dari urang nan indak sakali juo kalua. Kok iyo cadiak dek marantau, baa kok jauah-jauah dari rantau, baliaknyo manggaleh sate juo di kampuang? Iyo-lah hongok raya waang mah…”

Badai tadiam, indak tajawek kato-kato koncopalangkinnyo tu.

“Dek cadiak waang, tu mah. Urang nan ka mambali sate waang ka pondok ko, tabang ambua se sadonyo. Maso harago sate waang naiak-an dek gara-gara gampo jo tsunami di Japang? Apo lo hubungannyo? Dagiang jo baro waang impor dari Japang?”

“Indak masalah import doh kawan. Harago ko naiak karano banyak nan indak bisa dibali di pakan. Duo hari sasudah gampo jo tsunami, indak ado urang manggaleh di pakan doh. Keceknyo, takuik ko gampo jo tsunami tibo pulo, jadi labiah rancak maanok se di rumah dulu…”

“Kawan, kok kawan nan andia, andia se-lah suran.  Jan diajak pulo urang  andia samo jo kawan. Kok gampo, iyo indak ado nan bisa manakok doh, tapi kok tsunami ado ituang-ituangannyo. Ado syaraiknyo. Misalnyo, gamponyo gampo gadang, labiah dari anam, tampek gamponyo di lawik, pokoknyo ado nan bisa diuka. Kok tsunami tu sampai ka nagari awak nan di darek ko, iyo-lah indak dapek dek awak lai. Lah saparo kiamaik mah. Kok dek gampo jo tsunami di Japang waang naiak-an harago sate, iyo indak masuak dek waden doh,” Karapai baliak tagang pinggiang di muko Badai, sudah tu inyo bajalan maninggaan pondok sate tu.

Badai indak manjawek. Inyo maraso, apo nan dikecek-an dek kawan sapamaiannyo sajak ketek tu ado batuanyo. Harago sate dinaiak limo ratuih. Duo alasannyo sabalun manaiak-an harago sate tu. Partamo, untuang-untuang indak ado nan tau karano harago limo ratuih tu indak gadang amaik doh. Kaduo, disangkuik-an jo gampo sarato tsunami di Japang, untuang-untuang kok lai dimaklumi dek urang nan ka babalanjo.

 Pondok sate nan tadi bakalibuik, kini indak surang juo di sinan lai.*

CATATAN:

Tulisan ini dimuat di Harian Umum Rakyat Sumbar, pada rubrik TUKANG KIPEH, edisi  14-03-2011