Sate Valentin

 Oleh: Firdaus

 Karapai tangango. Muncuangnyo tabukak, kok ado langau sasek, bisa agak lima baleh sakali masuak. Kaniangnyo bakaruik tujuah baleh lampih. Matonyo mangetek, kapalonyo digeleang-geleangan bantuak urang bazikia di surau.

“Dek a waang?” tanyo Karapai.

“Ha..? Lai indak tabaliak tu, waden nan kabatanyo ka waang, manga waang dek tangango bantuak itu? Kagum waang mancaliak pondok sate waden?” tanyo Badai.

Karapai antok se, indak manjawek, “kok coitu, iyo waden pacayo, waang kagum mancaliak galeh sate ko. Iko nan kreatif kecek urang kini mah kawan…” sonsong Badai.

“Indak kagum bagai waden doh, lai indak tasapo waang? Di lubuak ma waang mandi kapatang?” Karapai baliak batanyo.

“Kok waang kecek-an waden tasapo?”

“Ba-a kaindak tasapo den kecek-an. Pondok sate waang se kini lah merah jambu, tu waang buek pulo sate raso coklat. Lai indak sawan aia waang ko kawan?”

“Jiko itu nan waang tanyo, lah jaleh dek waden. Waang caliak-lah iduik kini, itu nan dikecek-an dek urang peluang, peluang tu musti dijadian uang alias pitih atau kepeang,” kecek Badai.

“Mukasuik waang, dek ari ko hari valentin, tu waang sasuaian jo galeh waang?”

“Yup pren. Dima-dima se urang bacurito valentin, banyak nan digalehan. Ada coklat, bungo, tu warnanyo merah jambu. Dek karano nan waden galeh ko sate, mako kini den buek sate valentin,”

“Iyo-lah sakik waang mah. Valentin urang, valentin pulo waang. Lai tau waang apo tu valentine?”

“Dek den, indak paralu tau apo valentin tu doh. Nan paralu dek den, karano kini urang bavalentin, den manyasuaian sajo,”

“Kalau baitu, indak kreatif waang doh, tapi turuik lunduik se. Mahambua urang mahambua pulo waang. Sudah tu, galak urang galak pulo waang, nan digalak-an urang tu waang. Untuang-untuang ka basi juo lah galeh waang ko sado alahnyoi”

“Tu sasek doa waang mah. Ko nan kalamak dek waang!” Badai paneh, sakik atinyo dek doa Karapai. Diambiaknyo katupek nan alun babukak, dibae-an ka muko Karapai. Sakali Karapai mailak, katupek tu malayang ka balakangnyo.

“Sorry man, jan waang salah-an waden. Aden hanyo mengingek-an waang, valentin tu indak punyo awak tu doh. Itu caro urang-urang indak batua untuak mauwik sandi-sandi iduik awak…”

“Mukasuik waang?”

“Lai tau waang ndak, hari valentin tu asanyo dari wakatu matinyo urang sasek nan banamo valentin. Inyo dihukum dek karano salahnyo, eh… dek urang-urang nan mamujanyo, inyo dianggap pahlawan. Salain tu, katiko tu kerajaan Islam di Spanyol dikalahan dek tantara valentin, itu nan dirayoan urang tu tiok taun. Tu waang ikuik pulo?”

Badai kini nan tangango. Inyo indak manyangko konco palangkinnyo tu tau jo apo tu nan valentin. Sasak anggoknyo. Mandanyuik-danyuik jantuangnyo.

“Kok baitu, tolonglah waden kini. Den indak kamanggaleh tak anti, pokoknyo indak ka bavalentin waden doh,” jawek Badai, sudah tu diambiaknyo karate karton, tu ditulihnyo gadang-gadang;  Hari ko  Perai!

“Mukasuik waang, Dai?”

“Den peraian se sate hari ko, indak paralu dibayia doh,” jawek Badai sambia mengecek-an, iko bantuak kasiah sayang dari inyo.*

Catatan:

Tulisan ini dimuat pada Harian Umum Rakyat Sumbar, edisi 14-02-2011