Proyek Pasa

Oleh: Firdaus

Ndak paralu diagiah tau, apo nan tabaun sapanjang ari lai doh. Sapanjang carito urang manggaleh sate di Nagari Matiraso, nan baun bawang goreang dibaka di baro lah carito sajak saisuak, indak ado nan labiah dari baun bawang goreang. Iko baun tando ado urang manggaleh sate.

Dek baun itu pulo, indak saketek urang nan singgah di lapau sate Tukang Kipeh. Indak saketek pulo nan ka mancubo sagalo sate nan dijual Badai. Jika salamo pun hanyo mancubo sate Danguang-danguang, kini lah dicubo lo sate Madura. Eh… katiko lah dicubo e sate tu, ndak saketek lo nan ma upek, iko sate kacang namo e mah.

Dek rami urang di lapau konco palangkin e, Karapai nan panjang aka maosong garobak lo ka situ, “tumpang den manggaleh jo garobak di siko, kok lai laku, den agiah lah waang agak dua atau tigo piriang sahari,” kecek Karapai ka Badai, katiko hari pakan tiga pakan nan lampau.

Sabalun dijawek Badai katiko tu, Karapai indak bapikia lai. Dipancang-an dua buluah di ujuang garobak tu, takambang lai merah, tu ciek meja panjang jo tampek duduak paleh-paleh nan dari buluah.

“Kadipanga-an lah paja ko-a,” upek Badai indak dapek mailak.

Ba-alo ka mailak, sajak ketek kaduonyo lah jadi konco palangkin. Kok ka dilarang, beko dikecek-an pulo indak setia kawan lai, beko dipagunjiang-an pulo, mantang-mantang alah barasaki, eh lah lupo jo kawan.

Dek indak takao malarang konco palangkin tu, eh.. nan lain malah balanteh angan. Sajak garobak Karapai tagak di situ, ado-ado se nan sato. Mulonyo tagak sambia lalu, tagak agak sabanta, tagak agak sajam, dua jam, ampek jam, satangah hari, eh.. lah sampai sahari. Ado malah nan indak bakarunciang-an, sudahlah indak maagiah tau, garobaknyo molah ditinggaan bagai.

Dek tabik suganyo, dikumpuan ka sado nan manggaleh di laman rumah rang gaek-e, nan tapek di muko pondok sate-e.

“Den indak katuju kalian tagak di siko doh, manga kalian manggaleh di siko. Bantuan indak ado se tampek lain dek kalian…” Badai emosi. Muko-e sirah.

Karapai galak senggeang, “apo lo hak waang malarang kami manggaleh di siko?”

“Kalian marusak rono rumah rang gaek den,”

“Jan sumbarang mangecek waang, aden jo nan lain manggaleh di laman waang bagai doh, lah di lua garih bateh tanah rang gaek waang mah,”

Mulonyo Badai tagagau. Batuo juo kecek kawan-e nan surang ko. Tagagau sabanta, indak mambuek-e panik, ado se jawek untuk mausia urang nan manggaleh tu.

“Samantang pun baitu, nan kalian kan di muko jalan ka masuak ka rumah rang gaek den,”

“Jalan tu, tanah rang gaek waang atau punyo urang banyak?”

“Yo, punyo basamo”

“Tu manga pulo waang larang urang di sinan? Kecek rang kini, tu namo-e melanggar hak azazi mah”

“Setan dek ang, jan hak azazi lo nan waang sabuik-sabuik, dek hak azazi tu, rarak sado no mah. Urang indak ado raso-raso dek hak azazi tu mah,”

“Kok hak azazi pulo nan waang salah-an?”

“Kan iyo jaleh mah, dek manjago hak azazi urang, hak azazi laman rumah rang gaek den indak kalian jago bagai doh”

“Saba-lah kawan, urang saba disuko Tuhan. Kok manumpang kami di siko, kok lai pulo ka manumpang rasaki kawan jo kami isuak,”

Badai taduduak dek kecek konco-e tu. Ado bananyo kecek-e. Dek karano ati lah kusuik sajak mulo, Badai mararau taruih, “manga kalian mangaleh di siko? Babulo rono laman pondok rang gaek den,”

“Kok indak di siko, di ma lo kami ka manggaleh la-i?”

“Tu indak urusan den tu doh. Kalian kecek-an siko pasa?”

“Dek pasa nan indak salasai tu molah kami ka siko manggaleh lai”

“Kan lai banyak pasa di nagari wak ko mah, manga kalian kaniak…?”

“Pasa nan ma nan waang mukasuik? Pasaraya, sajak gampo lah indak sandereh bantuak-e lai. Dikecek-an ka wali tu, indak didanga doh, dipasak-an ka nan lain, indak didanga doh. Binguang den dek-e. Antah iyo indak tadanga dek-e, antah talingo-e tu bana nan turiak,”

“Nan lain kan adoh mah..”

“Ang co indak tau se-mah. Di nagari wak ko, Nagari Matiraso ko, pasa dibuek dek karajo proyek se, indak dek karano diparuluan dek awak-awak nan badarai ko doh. Ang caliak-lah, indak saketek pasa dibuek, eh.. indak ado nan paguno ciek-e doh. Baitu juo tampek parantian oto, sabanyak nan dibuek, sabanyak itu pulo salasai sasudah dibuek. Indak dipagunoan, indak pulo paguno doh. Sabuik se-lah pasa jo tampek parantian oto di bukik sarungan, pasa jo parantian oto banteng di jorong pasman, pasa di amura, pasa babaso, pokoknyo indak taituang doh,”

“Kalera mah…”

Karapai tasintak. Darahnyo turun naik. Garamannyo badaruak-daruak. Indak bisa manarimo. Inyo mangecek-an apo nan inyo tau, indak taunyo dapek upek pulo, “sia nan waang upek-an?” tanyonyo manantang.

“Tasarah se-lah…” Badai bajalan ka pondoknyo. Atinyo marumeh! *

                                                                                                 fIrda71_padang@yahoo.com

CATATAN: Carito ko dimuek di koran Harian Umum Rakyat Sumbar Utara (kini banamo Harian Umum Rakyat Sumbar), pada hari Sanayan, 17 Januari 2011